وايد كتبنا عن مطاعم ومحلات واشياء تونس وتسلي ,, ليش ما نتكلم عن التصرفات او السلوك السيء الي يتعاملون فيه الناس بالشارع .؟

 صارلي فتره اشوف العجب العجاب بالطريج باص يمشي على الحاره اليسار  بسرعه 80  ,ولا سائق يسكر على السيارات عشان ياخذ عيال

المعزب من المدرسه وبعدين ويا هذيل الاشخاص الي ماخذين مبدا ( كل الناس يسون جذي او عادي محد بيخالفنا ) وين القانون الصارم

طالعه من الدوام وصادفت باص فيه طالبات ابتدائي ,, طول الطريج البنات يقطون قراطيس و اكلهم من الدريشه

شوفوا بالصوره شلون البنيه تتفنن في حذف التفاحه من الدريشه

لاحظوا ان طول الطريج تطلعها وترد تدخلها ماتدري تحذفها بالشارع ولا على السياره الي يمها

تتوقعون وين الغلط ؟ انا اقول اللوم كله على الاهل طفل بالابتدائي اذا ما تعلم ان هالاشياء غلط بيكبر عليها وبيصير عنده شي عادي لان محد عاقبه على  هالشي ,,  ثاني شي هذي نعمة الله شلون تقطها بالشارع وبهالطريقه في وايد مبادئ لازم نعلمها لعيالنا وخوانا  عشان نتفادى هالاشياء

من حظي ان الشارع كان واقف نزلت الدريشه وكلمتها قلت لها ان هذي نعمة الله حرام تقطينها على الارض مسكيها لين توصلين بيتكم وقطيها بالزباله  كملت كلامي وقلتلها وانتي موصح تحبين الكويت شلون ترضين توصخين ديرتج الي تحبينها ابتسمتلي وقالت اوكي

هالطفله اتوقع ماراح تعيد الحركه مره ثانيه تخيلوا اذا كل واحد منه شاف الغلط وتكلم فيه باسلوب حلو مو بالهواش والطق صدقوني صج بنتعب بالبدايه بس على الاقل بنقدر نغير جزء بسيط من هالناس الي فاهمين الدنيا بالمقلوب

🙂

Advertisements